Davao City- Wala kaayoy pasahero nga nibyahe sa Davao Overland Transport Terminal kung ikumpara sa regular nga mga adlaw.
Gibutyag ni Aiza Usop, DCOTT Operation Manager nga apektado ang mga kumpanya sa bus kay gamay ra ang mga pasahero kini tungod sa nahitabong duha ka adlaw nga Nationwide Transport Strike.
“Pinakamenos nato is 35,000 a day nga mga pasahero, tan-aw nako wala kita kaabot it’s because bisan normal ang atong biyahe pero dili gyod puno ang atong mga bus,” sumala ni Usop.
Segun ni Usop nga tungod kay gamay ra ang mga namasadang mga jeep sa dakbayan sukad kagahapong adlawa rason nga maglisod ang mga commuters nga musakay padulong sa terminal.
“Maglisod sila’g adto sa terminal kay gamay ra ang namasada kagahapon ug karon maong ila nalang gi-rescheduled ang ilang mga biyahe,” segun ni Usop.
Samtang, ugmang adlawa lauman nga mubalik na sa normal ang hidaghanon sa mga pasahero sa terminal atol sa pag-resume sa mga klase ug trabaho.
RadyoMan Aimee Guinita
