Davao City – Matag pasko, di’ gyud mawala sa listahan sa kadaghanan ang mga lugar nga adtuan.
Apan dili lang lugar ang ginakunsidera gumikan kitang mga Pinoy di’ gyud paiwit basta habhab na ang hisgutan.
Dinhi sa ginatawag nga Land of Promise, ang Davao City, matag tuig adunay aktibidad nga ginalusad ang lokal nga panggamhanan aron mahimong sadya, halandumon ug mahinungdanon ang kapaskuhan ug kini mao ang Pasko Fiesta sa Davao.
Usa sa mga gikahinaman sa mga Dabawenyo ingon man mga bisita mao ang Pasko Fiesta Salu-salo nga nahimutang sa Sta. Ana Wharf diin kini ang usa sa bag-ong aktibidad karong tuiga nga gihulat gyud sa kadaghanan.
Ang maong aktibidad nag-abri sugod niadtong Nobyembre 30 ug kutob pa kini karong Disyembre 30 diin pinasahi nga putahe ug halal food and goods ang gi-display nga swak usab sa bulsa sa atong mga higala gani perfect place usab alang sa mga gusto og bonding ug magkitaay nga mga paryente ug mga kahigalaan.
Alang kanako, ang Pasko Fiesta Salu-salo maoy usa sa mga pamaagi nga magsalo-salu ang magpamilya, magparyente, maghigala ingon man mga estranghero dili lang sa pagkaon kundi sa pag-istoryahanay ug pagkamustahay sa matag usa.
Gawas sa kan-anan, aduna usab Christmas tunnel didto usab mismo sa Sta. Ana Wharf nga gipasiga niadtong miaging bulan.
Sumala ni Cecila Gandilan nga taga Bangkal ning syudad, dako og kausaban kada tuig ang mga aktibidad sa Pasko Fiesta sa Davao.
“Malipayon kay lain-lain ug naay improvement ang mga aktibidad, maayo usab ang pagsuroy, malinawon, peaceful ug nindot,” segun nni Gandilan.
Subay usab sa seguridad, alerto kanunay ang Task Force Davao diin sumala ni TF Davao Commander Col. Nolasco Mempin, gipaniguro nilang dunay igong personahe ang ipakatag sa syudad ilabi na sa mga laaganan aron masigurong luwas ang pagpanuroy sa mga dabawenyo ingon man mga turista apan gipanawagan gihapon ang ilang koordinasyon ngadto sa otoridad bahin gihapon sa seguridad.
“Continue pa rin ang coordination, be vigilant and report any untoward incidents, suspicious person, unattended baggage so that security forces would take appropriate actions,” sumala ni Mempin.
Taliwala sa mga hulga mapa social media man o madungog mismo sa katawhan, wala kini nakapugong sa mga tao nga himuong memorable ang ilang pagselebrar sa Pasko.
Busa kada tuig, daghan ang naglaum nga lain-lain usab ang mga pinasahing aktibidad ang ilang makita ug masaksihan.
Tinuod gayud nga ang mga Pinoy daw bisan murag bao nga gapas-an og nagkalain-laing problema, nagpabilin gihapon ang pagkapositibo nga kini masulbad ra ug mulabay ra ang tanan mao ng kada pasko ginakuha gyud nila ang opurtunidad nga mabutngan og kurba ang mga nawong pinaagi sa pahiyom mapagamay o dagkong pahiyom man kini.
RadyoMaN Renz Barbarona
