Davao City- Ilabihang kalipay ang nabati sa mga dabawenyo ug mga bisita nga misaksi sa Annual Christmas lighting ceremony diin opisyal na nga gi-abrihan ang Pasko Fiesta 2017 dinhi sa Davao City.
Gipahigayon ang maong seremonya sa Rizal Park sa dalang San Pedro ning syudad ug gisugdan ang programa alas 6 sa kagabhion ug nahuman pasado alas 7 sa gabii.
Gipangunahan ni Davao City Mayor Inday Sara Duterte-Carpio ang maong opening ceremony kauban ang uban pang government officials dinhi sa dakbayan.
Sa gi-andam nga programa sa lokal nga gobyerno ngadto sa publiko, nagkadaiyang talento sa mga dabawenyo ang gipasundayag, sayaw ug kanta nga pampasko diin asa ang mga tawo nalingaw pag-ayo.
Si Michelle Alforque, 28 anyos ug taga Matina Pangi ning dakbayan, walay pakyas sa pag adto sa opening sa Pasko Fiesta gani kaganina kauban niya iyang mga higala aron masaksihan ang main highlight sa seremonya nga mao ang dungan nga pagpasiga sa nagkadaiyang Christmas lights, 40 ft. Christmas tree, ug nagakalain-laing decorations nga gipangmungtar sa key areas sa syudad lakip na ang Davao City hall ug Sangguniang Panlungsod.
Karong tuiga ‘Candy Land’ ang tema sa decors diin napuno kini sa mga lollipops ug candy-like decorations.
Human sa opening kaganina, gipangandaman na usab ang nakalinya nga mga aktibidades sa Pasko Fiesta diin base sa opisyal nga listahan sa Office of the Davao City Tourism Operations Office kun CTOO, dunay kapin 20 ka mga aktibidades ang gi-andam nga gigahinan og 17 million pesos nga budget aron mas mahimong mabungahon ug magmalipayon ang selebrasyon sa mga dabawenyo sa pasko.
RadyoMan Renz Barbarona
