Davao City – Nunot sa gi-atubang natong pandemya dili mawala ang espiritu sa Kapaskuhan diha sa atong kabarangayan.
Kini ang gisiguro ni Association of Barangay Captains President Edgar Ibuyan Sr. atol sa interbyu sa RMN Davao kaniya diin gibutyag niini nga dili mawala ang pag-ala Santa Claus sa barangay officials diin manghatag sila og pinaskuhan nga magamit sa tanan pambatok sa kagaw nga nikaylap karon.
“Manghatag ta og pang regalo sa ila pero ang kalahian na karon kay dili na pagkaon… naay facemask, face shield ug alcohol,” segun ni Ibuyan.
Saysay ni Ibuyan nga dili na kinahanglan muadto pa sa barangay ang mga benepisyaryo niini sanglit sila na mismo ang maglibot-suroy sa dakbayan dungan sa pagtuman sa minimum health standards diin pila ka tuig na sab nila kining ginabuhat.
“Kami mag libot-libot sa siyudad (kay) di man ka pwede mupondo (maong) i-itsa nalang kay nakabalot naman pod ni so safe siya (ihatag) labi na nanhinahanglan ang tawo niini karon… dugay na kaayo ni siya, pila ka tuig na natong ginahimo maong suportado gihapon sa atong presidente kining Santa Claus,” dugang ni Ibuyan.
Dugang ni Ibuyan nga anaa sa kapin kon kulang 10,000 ka mga regalo ang ilang ipanghatag sa adlaw sa Pasko.
Sa pikas bahin, nakapang-apod na sab og kapin singkwenta mil ka mga food packs ngadto sa mga Dabawenyo pinaagi sa tinuig nga gift-giving sa pamilyang Duterte.
RadyoMaN Jason Amisola
