Davao City – Samtang nihunong ang kalibutan ug nausab ang dagan sa kinabuhi sa katawhan tungod sa dili makitang kalaban nga mao ang COVID-19 kun coronavirus disease 2019, naglumba usab ang mga health workers o gitawag natong mga frontline soldiers sa pagsalbar sa mga kinabuhi sa mga tao sulod sa mga ospital.
Upat ka tuig nga residente sa Department of Emergency Medicine sa Southern Philippines Medical Center si Dr. Jalil Ken Dayo.
Sumala sa atong frontline doctor, pinaka-challenging kini sa iyahang propesyon ang giatubang nga krisis sa COVID-19.
Inay magselebrar sa iyahang pamilya kada Pasko ug Bag-ong Tuig, si Dok Ken anaa sulod sa ospital ug padayong gapanambal bisan pa man sa giatubang nga hulga sa panlawas ug sa ilahang mga kinabuhi nunot sa deadly virus.
Aminado kini nga lisod kaayo ang ilahang trabaho isip doktor nga kinahanglan nilang magsuot og mga personal protective equipment ug time consuming kini samtang ilahang ginamonitor ang kondisyon sa mga pasyente.
Matud niya walay gipili ang COVID-19 kay mismong siya naigo sa maong balatian ug karon usa na sa mga COVID-19 warriors ug survivors.
Life changing sumala kang Dayo ang iyahang mga kaagi karong 2020 isip usa ka frontline doctor tungod mas nilig-on pa ang iyahang relasyon ngadto sa Ginoo, mas na-appreciate niya ang oras sa pamilya, higala ug pagpalig-on sa iyahang pisikal, mental ug spiritual health.
Ug karong holiday season, giawhag ni Dayo ang tanan nga dili iubos ang ilahang alerto batok COVID-19 pinaagi sa pagtuman sa mga heath protocols ug musalig sa labawng magagahom nga rason sa pagsaulog niining Kapaskuhan.
RadyoMaN Aimee Guinita
