Davao City – ‘Pasko sa Pandemya’ o mas madungog nato karon nga pulong nga ‘PasCovid.’
Kini ang usa sa mga naandang selebrasyon sa atong kinabuhi nga adunay dakong adjustments karong tuiga nunot niining hulga ug padayong presensya sa COVID-19 sa atong taliwala.
Kung kaniadto, makagawas-gawas pa ang mga bata ug mga edaran aron makalaag-laag diha sa mga Christmas attractions, karong tuiga, subay sa gipagula nga mga IATF guidelines, gidili usa alang sa mga bata ug mga edaran ang paggawas sa balay gumikan kay bulnerable kaayo sila ning makamatay nga virus.
Usa sa mga Executive Order nga namugna sa Davao City mao ang EO 57 – An Order Regulating Mass Gatherings and Prohibiting Non-Essential Travel Within Davao City and For Other Purposes Until December 31, 2020’ diin gidili ang Christmas Parties karong panahona gumikan sa hulga sa COVID-19.
Samtang naandan na usab sa mga Pinoy ang ‘Misa de Gallo’ kada Pasko, karong panahona, adunay mga regulasyon nga gipatuman sama sa mga edaran ug mga bata nga dili maka attend sa on-site mass inay gi-awhag nalang nga mag online mass na lamang silbing paglikay sa takod sa virus.
Usa pa ka nahimong diskusyon karon ang pahinumdom sa gobyerno ngadto sa mga Pinoy nga pagdili usa sa videoke sa publiko gumikan sa ‘talsik-laway’ events nga basin maoy hinungdan na unya nga matakdan sa fatal virus.
Ang videoke sa holiday seasons nahimo nang parte sa kinabuhi sa mga Pinoy busa karon ekslusibo lang usa sa panimalay ang pagkanta karong Kapaskuhan ug Bag-ong Tuig.
Si Roger Cabalida nga taga Davao de Oro, gimingaw sa mga Pinoy tradition matag Pasko sama sa pagpanaygon, pagduaw sa mga higala, mga panagtapok-tapok.
Apan bisan pa man sa gibating kamingaw, aduna gihapoy mga pamaagi aron maka-connect karong panahona sama sa ginatawag nga virtual celebration.
Sumala ni Cabalida, ang pagselebrar sa Pasko sa pamilya, mapa-virtual o anaa mismo sa panimalay ang imong presensya angay nga ipagpasalamat ngadto sa Kahitas-an.
“Dili gyud siya totally mingaw kay mag-celebrate man ta og Pasko uban ang pamilya. Sa panahon sa Pasko, di na importante ang handaan nga bongga labi na karon nga krisis kaayo ang panahon, ang uban way trabaho…. Ang importante magpabilin tang lig-on, healthy always,” segun ni Cabalida.
Ilado ang mga Pinoy sa daghang kapamaraanan aron madayon lang ang selebrasyon, naa may kwarta o wala, naa may pandemya o wala.
Ako nanghinaut nga kon unsay leksyon nga dala sa COVID-19 pandemic sa atoa karon, atong madala ug ma-apply kini sa musunod pa nga mga panahon ug sa bisan unang hagit sa kinabuhi.
Bisan pa man sa pandemya, dili nato kalimtan nga mas dako ang Ginoo kaysa sa mga problema, mas gamhanan ang Ginoo kaysa sa virus ug kontrolado sa Ginoo ang tanang mga nagapanghitabo karon.
Matud pa sa Psalm 46:1, “Ang Diyos mao ang atong kusog ug tigpanalipod. Andam gayod Siya kanunay sa pagtabang sa panahon sa kalisod.”
Atong i-selebrar ang matood nga rason sa Kapaskuhan nga mao ang kapanganakan ni Hesu Kristo.
RadyoMaN Renz Barbarona
