Davao City – Ang Pasko karong 2020, dako’g kalahian kung itandi sa mga selebrasyon sa milabay nga katuigan.
Kini gumikan sa nasinatiang pandemya hatud sa Coronavirus Disease 2019 (COVID-19) apan kinaiya’ng Pinoy labi na gyud ang Davaoeños, way makapugong sa selebrasyon apan kinahanglang adunay ipatumang limitasyon.
Sa matag probinsya dinhi sa Davao Region, nagkalain-laing health and safety protocols ang gipatuman aron nga maselebrar nga malinawon ug luwas ang Kapaskohan.
Sa Davao de Oro, mamahimo gihapong makauli sa Pasko kauban ang pamilya, apan kinahanglang i-comply ang rekisitos nga gikinahanglan sama sa medical certificate aron masigurong luwas gikan COVID-19 ang musulod sa probinsya.
Sa Tagum City, Davao del Norte, luyo sa pagkansela sa mga aktibidad, naghatag gihapo’g kahayag sa Tagumeños ang gipasigang Christmas tree nga pinakataas sa milabay nga tuig sa tibuok Pilipinas.
Istrikto usab nga gina-inspeksyon ang QR (Quick Response) Code sa mga musulod o bisan muagi lang sa dakbayan.
Sa Davao Oriental, hugot usab nga gidili ang parties labi na karong holiday season ug kinahanglang dili mulapas sa 25 ka tao ang magtigom.
Nagbaton usab sila og curfew ug gi-diskurahi ang pag-videoke.
Sa Davao del Sur, nagbaton og adjustment ang probinsya sa curfew hours alang sa holiday season.
Niadtong December 16 hangtud 24 nagbaton og 8PM to 4AM nga curfew hours samtang, 9PM to 5AM ang curfew gikan December 24 ug December 31 ug hugot usab nga ginapatuman ang health and safety protocols batok COVID-19.
Sa Davao Occidental, sa muoli o mubisita sa probinsya karong Pasko, kinahanglang sundon ang guidelines sa Executive Order 49 Series of 2020 aron magiyahan sa angay andamon.
Samtang dinhi sa syudad sa Davao, hugot usab ang gipatumang protocols subay sa mga direktiba ilawom sa Executive Orders sa dakbayan.
Kanunay’ng gipahinumdom ni Davao City Mayor Sara Duterte-Carpio nga batasanon ang pagpasalamat sa maayong panglawas nga gihatag sa Labaw nga Makagagahum.
“Everyday gitagaan ‘ta sa Ginoo og good health…(This) is something to be thankful pirmi. We should always give a thanksgiving prayer na we are blessed with good health. Dili nato na kalimtan,” segun sa Alkalde.
Managlahi man ang protocols ug mahimong selebrasyon matag probinsya, ang importante nga mabatokan ang COVID-19 ug maselebrar nga malipayon ug luwas ang Pasko luyo sa pandemya diin kini nagkinahanglan og disiplina ug panaghiusa.
RadyoMaN Kirby Manzon
