‘Pass or fail’ grading system mas epektibo

36

Davao City – Pabor ang usa ka principal sa usa ka tulunghaan sa distrito sa Marilog ning dakbayan sa Dabaw sa gisugyot sa Alliance of Concerned Teachers kon ACT nga ‘pass o fail’ grading system isip maoy basehan sa paghatag og pasado ug hagsa nga grado sa mga estudyante sa elementarya ug sekondarya sa mga pampublikong tulunghaan sa pag-abli sa klase karong buwan sa Oktubre 5, 2020.

Gipasabot ni Harvey James Palwa, Marilog Betan Integrated School Principal nga mas epektibo ang ‘pass or fail’ grading system ikumpara sa numerical grading system sa Blended Learning System sa pag-hatag og grado sa mga estudyante nga mag-eskwela karong Oktubre.


Rason ni Palwa ngano mi-uyon kini sa ‘pass o fail’ grading system kana tungod dili masuta sa magtutudlo kung ang mga estudyante ba o ang mga ginikanan ang magtubag sa mga assignments ug buhatunon sa modules exercises ug uban pa.

Dili pareho sa Numerical grading system nga ang sukdanan sa paghatag og grado mao ang partisipasyon sa klase, quizzes, examination, sports, ug uban pa apan ilawom sa ‘pass o fail’ grading system mao ang i-sumite nga mga aktibidad ug pagtubag sa modules ubos sa sistema sa blended learning.

Hinoon gipaniguro sa maong Principal nga kung unsa ma’y tahakon nga grading system sa Department of Education mao sa’y ilang tumanon ug sundon ug dili na sila magbuot-buot sa ilang kaugalingon.

Nasayran nga wala dawata ni DepEd Secretary Leonor Briones ang sugyot sa ACT partylist nga mao ang ‘pass o fail’ grading system tungod sa epekto sa performance sa nasud sa Programme for International Student Assessment sa mga estudyante nga nag-edad og 15 anyos pataas gikan sa 79 ka nasud nga naghimo og economic Cooperation and Development.




“Kanang ‘pass or fail’ grading system pabor ko ana sa karon nga panahon sa COVID-19 pandemic kay lisod man gud kaayo ‘tong numerical kay dili man gud nato makita ang bata. Ang purpose man gud sa numerical grading system is ang capacity sa bata ang gina-measure. Karon wala may basis kundi more on learning activities sa bata ug kung dili siya maka-comply, wala siya’y gipasa, wala siya’y portfolio, so meaning to say passive ang iyahang pagtuon,” segun ni Palwa.

RadyoMaN Joel Viray

Facebook Comments