Davao City – Mabutang sa alanganin ang pagpanarbaho ug ang seguridad sa mga Overseas Filipino Workers (OFW) nga atoa sa Tripoli, Libya kung kanselahon sa gobyerno ang ilang mga passport.
Kini ang pahimangno ni Alliance of Progressive Labor Secretary-General Joshua Mata ngadto sa gobyerno nga kun kanselahon ang passport sa mga trabahante nga atoa sa Libya, mabutang sa kadelikado ang ilang panarbaho ug ug pagbiyahe tungod sa civil war nga nahitabo sa mao nga nasud.
Sumala ni Mata nga dili solusyon ang passport cancellation kontra sa mga gahi’g ulo nga OFWs kinsa atua karon sa tungang sidlakan.
Dili magsilbi ang tanyag nga abagahon ang tanang gasto sa pagpauli sa mga Pinoy gikan sa Libya paingon nganhi sa Pilipinas tungod sa kabalaka nga basin wala silay maangkon nga trabaho ug magutman lang ang ilang mga pamilya.
Matud ni Mata nga sagad sa mga OFWs nagtenir og dakong utang sa ilang paglarga wala pa’y labot ang pagpadala og salapi ngadto sa ilang mga pamilya nga ania dinhi sa Pilipinas.
Bisan og nahibaLo na sila kung unsa ka peligroso ang sitwasyon sa Libya karon apan, mas pilion pa nila ang pagsugal sa ilang mga kinabuhi kay sa mawad-an sila og pangita.
Gani gipasabot pa ni Mata nga dili na bag-o ang kahimtang sa Libya kay bisan ang Iraq ug Kuwait kaniadto gitay-og sab og kasamok apan ang mga Pinoy wala gayod mubiya hangtud nahuman ang giyera sa maong mga nasud.
Busa gi-awhag ni Mata ang gobyerno nga buhaton na lang ang ilang responsibilidad aron mapanalipdan ang mga OFWs ug dili sila mapagan sa kagubot karon didto sa Libya.
RadyoMaN Joel Viray
