Sa Facebook post ni Ana Diego, gihinumdom niini ang sakripisyo sa biktima nga si Eugenio Ewag, 62 anyos, residente sa nahisgutang barangay diin siya usa ka pastor ug usa ka kanhi Civilian Volunteer Officer.
Sa interbyu sa DXDC RMN Davao kang Police Chief Master Sergeant Norvy John Yadao, imbestigador sa JAS Municipal Police Station, gibutyag niini nga ‘personal grudge’ ang motibo sa pagtigbas sa suspek nga nailang si Jorem Migoc, 27 anyos, residente sa naasoy nga lugar, diin kini aduna existing warrant tungod sa iyang kasong murder didto sa Davao de Oro.
Gisaysay sa imbestigador nga tungod sa personal nga bangi, gina-ingnan na sa biktima ang suspek nga iyaha kining isumbong kung asa kini nagatago-tago tungod sa iyang salaod nga nahimo.
“Ang suspek, wanted gihapon ni siya. Naa syay warrant of arrest. Naa gihapon syay napatay sa Monkayo (Davao de Oro). Then, kining biktima nag-ingon (sa suspek) nga “Isumbong ta ka sa mga pulis.” Mao ‘to ang hinungdan,” matud ni Yadao.
Laing kasong murder ang atubangon sa suspetsado nga padayon karong ginalutos sa awtoridad.
RadyoMaN Kirby Manzon
