Sigma, Capiz – Patay ang 46 anyos nga lalaki matapos ginpulihan buno sang duha mga mga suspek nga kaupod man sini sa pag-inum mga alas 9:00 ang takna kagab-i sa Purok 5, Barangay Acbo, Sigma, Capiz.
Dead on arrival sang gindangat sa Dao District Hospital ang biktima nga si Sanito Arcelis y Regalado wala asawa kag residente sang nasambit nga barangay.
Ginkilala ang mga suspek nga sanday Romeo Altimo y Mendoza 19 anyos residente sang Barangay Acbo kag Jesus Baranet y Balsote 30 anyos sang Barangay Mianay, Sigma, Capiz.
Ba-se sa inisyal nga imbestigasyon sang Sigma PNP, magkaupod nga nag-inom ang biktima kag mga suspek.
Magapauli na kuntani ang biktima kag gindul-ong pa ini sang mga suspek, apang may nagtuhaw nga indi paghangpanay sa tunga sang biktima nga si Arcelis kag duha ka mga suspek. Diri kag ginpulihan buno sang mga suspek nga sanday Altimo kag Baranet ang biktima kun sa diin nag-angkon ini sang madamo nga mga pilas sa lawas nga gintunaan sang kamatayon sini.
Madasig nga nakapalagyo ang duha ka mga suspek apang natigayon man nga nadakpan ang mga ini sa ginpatigayon nga hot pursuit operation sang Sigma PNP. Nakahunong naman sa lock up cell sang Sigma Municipal Police Station ang mga suspek kag natalana nga pagapasakaan sang nagakaigo nga kaso.
