Nadulaan gid sang hulam nga kabuhi subong nga gab-i sa Western Visayas Medical Center si Eryl Alayon sang Sitio Lubo, Brgy. Tambunac, San Enrique, Iloilo matapos disgrasya nga nabungguan sang tricycle nga kasumalang sini sa kurbadahon nga dalan sa Imbang Pequeno kahapon Oktubre 27, 2018.
Sa impormasyon nga ginpalab-ot sang nagresponde nga mga aktibo nga miyembro kay Team Leader Cris Palomado sang Municipal Emergency Rescue Team, halin sa Passi City ang tricycle kag madasig ang padalagan sang driver rason nga wala gid nalikawan kag nabungguan ang likod nga bahin sang motorsiklo nga ginamaneho ni Alayon nga maga padulong kon tani sa syudad sang Passi.
Gilayon nga gindala sa Don Valerio District Hospital sa Passi City si Alayon apang tungod sa naangkon nga pilas sa ulo sini gin refer gilayon sa ospital sa Iloilo.
Nahibaluan nga naka inum ang driver sang tricycle rason nga nagpalagyo ini pagkatapos sang insidente.
Samtang manughalin na ang ambulansiya nga magadala kay Alayon sa Western Visayas Medical Center, bumalik naman ang driver sang tricycle nga may pilas sa agtang. Gilayon naman nga gintahi ang naangkon sini nga pilas kag wala naman ini gin admit pa sa ospital.
Ginapalab-ot sang MERT (Municipal Emergency Rescue Team) ang ila bag-o nga numero amo ang mga masunod:
San Enrique Emergency Numbers:
09480346548 09267154107
