Pilar, Capiz– Patay ang isa ka lalaki matapos luthangon sang riding-in-tandem sa Barangay Rosario, Pilar, Capiz. Ginkilala ang biktima nga si Rio Adrigado 27 anyos sang nasambit nga barangay.
Ba-se sa imbestigasyon sang Pilar PNP nga samtang yara sa amo nga lugar ang biktima hinali nga nag-abot ang isa ka motorsiklo sakay ang mga suspek nga ginkilala nga sanday July Bataanon 44-anyos kag Abner Bacanto Jr., 29-anyos lunsay mga residente sang Sitio Bat-us, Barangay San Ramon, Pilar, Capiz.
Hinali nga ginluthang sang backrider nga si Bataanon ang biktima. Nag-angkon sang igo sa natuo nga bahin sang dughan si Adrigado kag natumba ini. Gindala pa sa ospital ang biktima apang gindeklara nga dead on arrival sang doktor.
Natigayon naman nga nadakpan sang mga kapulisan ang duha ka mga suspek sa ginpatigayon nga hot pursuit operation kun sa diin nakahunong na ang mga ini sa karsel.
Isa sa mga ginalantaw nga rasun sang pagluthang ni Bataanon sa biktima amo ang pagtimalos matapos ginpahayag nga ginsumbag ni Adrigado ang anak sini sang may ginhiwat nga binayle sa Sitio Bat-us, Barangay San Ramon.
Natalana naman nga pasakaan sang kaso nga murder ang mga suspek.
