Jamindan, Capiz – Nakahunong na sa karsel sang Jamindan Municipal Police Station ang suspek sa pagpangluthang-patay sa Barangay Jagnaya, Jamindan, Capiz.
Boluntaryo nga nagasungka sa mga kapulisan ang suspek nga si Carlito Armada Jr, alyas Ibong, 42 anyos residente sang Sitio Nasagud, Barangay Lanot, Roxas City apang temporaryo nga nagatinir sa Brgy. Lapaz, Jamindan, Capiz.
Ginkilala naman ang biktima kay Alano Valiente y Gregorio, 44 anyos, isa ka panday residente sang Brgy. Jagnaya, Jamindan, Capiz. Nagluntad ang insidente mga 11:00 ang takna kagab-i, Disyembre 25, 2018.
Base sa inisyal nga imbestigasyon sang mga kapulisan magabakal sang sigarilyo sa tiyangge ang biktima sang gintambangan sang suspek kag ginluthang gamit ang calibre .45 nga armas luthang.
Nag-angkon sang igo sa liog kag tiyan ang biktima nga gintunaan sang iya kamatayon. Gindala pa sa Mambusao District Hospital, apang gindeklarar sang attending physician nga dead on arrival.
Suno sa impormasyon nga sang temprano pa, nagtambag lamang si Valiente sa away sa tunga sang suspek kag isa sa mga himata sang biktima. Bangud indi magpasaway, ginsumbag sang biktima ang suspek nga si Armada nga posible nga ginkaakig sini. Hugot ang pagpati sang tanan nga nagpauli na ang suspek, apang lipod sa ila ihibalo, gintambangan sini ang biktima.
Samtang 8:30 ang takna kaina sang aga, Disyembre 26, 2018 nagsungka ang si Armada sa kay PSUPT KIM LEGADA, OIC Provincial Director sa Capiz PPO. Ang nasambit nga suspek ang ginturn-over sa mga personnel sang Jamindan PNP, 11:00 kaina sang aga.
