Tapaz, Capiz – Patay gid ang tatlo ka mga menor de edad nga mga studyante matapos nga aksidente nga ginbunggoan ang ginasakyan nga motorsiklo sang isa ka bus liner alas 2:15 sang hapon sa Brgy. Poblacion, Tapaz, Capiz
Gindeklarar nga dead-on-arrival sang gindangat sa Tapaz District Hospital ang mga biktima nga ginkilala kanday John Lester, 16-anyos; Kenneth, 17-anyos sang Brgy. Cristina Tapaz, Capiz kag Ian Razel , 15-anyos ang pang-edaron sang Brgy. Initan Tapaz Capiz. Ang mga ini ang lunsay mga estudyante sang Tapaz National High School.
Base sa imbestigasyon sang mga kapulisan sang Tapaz, ginasubay sang bus liner nga ginamaneho ni Renato Sobreguel y Fuentes, 29-anyos sang Brgy. Agtoan Lambunao, Iloilo ang national highway humalin sa Iloilo padulong sa Poblacion Tapaz sang gulpi nga naguha sa by-pass road ang motorsiklo nga ginasakyan sang mga biktima kabangdanan sang pagkabunggo.
Bangud sa kabaskugon, nag-apok pa sang pila ka metros ang duha ka mga backrider samtang naipit naman ang driver sa unahan nga poryson sang bus liner. Boluntaryo naman nga nagsurrender sa mga otoridad ang driver sang bus nga si Renato Sobreguel nga sa subong ang nakahunong na sa karsel sang Tapaz PNP.
