TACLOBAN CITY – Nagpakamatay ba o ginpatay? Nakit-an han mga security guard han Leyte National High School an Technology and Livelihood Education teacher nga hi Romela Abrantes Segador ha luyo han classroom hini nga nakahigot hin pisi an li-og, hubo, ngan waray na kinabuhi.
Nabaraka daw an bugto ni Romela nga hi Rosana Segador kay diri na nakokontak an cellphone hini sanglit dayon hiya nga kumadto ha Leyte High dida han dominggo ala 1 han kulop upod an mga sekyu han nasabi nga eskwelahan.
Ha interview han RMN kan PSInsp. Edwin Canamaque, PNP Station 2 commander, waray may nakit-an nga bruises o samad an mga otoridad ha 23 anyos nga teacher sanglit waray pa hira nakikit-an kun gin-rape o ginkastigo ba hi Romela.
“Waray nakikita nga mga bruises nga gin-rape ba hiya o gin-abuso pero diri naton ito gindidiwara nga anggulo. Huhulton nala naton iton result han crime lab.”
Gin-check gihapon han mga kapulisan an cellphone han teacher kun nag-away ba hira han boyfriend ni Romela pero sweet messages la an ira nakit-an ha mga mensahe.
Sumala gihapon han bugto hini, bangin ginproblema han iya bugto an nakaprenda nira nga tuna nga posible marimata sanglit nadepressed ini.
Sumakob hi Romela ha LNHS sabado han kulop alas 5:48 ngan pagka-buwas dominggo han kulop nakit-an an patay nga lawas hini alas 2:45.
