Patay sa landslide sa Davao de Oro, misaka na sa 10

Davao City – Gipaningkamotan gihapon hangtod karon sa mga personahe sa Monkayo Municipal Disaster Risk Reduction and Management Office (MDRRMO) ang pagpangita sa usa ka nahibiling natabunan sa pagdahili sa yuta sa Mt. Diwata, Diwalwal, Monkayo, Davao de Oro.

Sa pakighinabi sa DXDC RMN Davao kang Jergrace Cabag, ang Public Information Officer sa Monkayo, iyang gibutyag nga sa ulahing report, narekober na ang patay nga lawas sa napulo katao apil na ang magpamilyang Gumatin lakip na ang mga anak nilang nag-edad 10, 9, 8, 3 anyos ug 1 ka tuig.

Gahapon nakuha sa otoridad ang usa ka Ritchell Rebuldad, Elvera Saldua ug Agnes Bitoon samtang critically injured ang 1 katuig nga bata.

Nagpabiling missing gihapon hangtod karon ang amahan sa pamilyang Gumatin nga si Rommel ug sumala pa sa iyang mga iyaan nga sila Rose ug Letecia Suan, paabuton nila ang patay nga lawas sa lalaki aron madungan og pahilona sa iyang asawa ug anak.

Subay niini, subling nagpahinumdom ang MDRRMO sa publiko kanunay mahimong abtik ug alerto ug perming maminaw sa abiso ug pahimangno sa otoridad aron di mabutang ang kinabuhi sa risgo.

RadyoMaN Ivy Parido