Davao City – Nakaplagan ang usa ka patayng lawas sa may Purok 4, Brgy. Dalisay, Panabo City niadtong Mayo 25, adlawng Biyernes.
Sa report gikan sa Police Regional Office kun PRO XI, giila ang biktima nga nakit-an sa creek nga si Gualberto Arampayan, 53 anyos, stay-in nga mag uuma sa usa ka umahan sa nasangpit nga lugar ug residente sa Brgy. Tamayong, Calinan ning syudad sa Davao.
Sumala sa kauban niini nga mag-uuma nga si Roseller Luzon, mibiya ang biktima sa ilang gipuy-an alas 8 sa gabii niadtong Mayo 24, adlawng Huwebes ug matud pa lango sa bino.
Dugang saysay ni Luzon nga sa susamang adlaw bandang alas 10 sa gabii, mibundak ang kusog nga ulan nga miresulta sa pagsaka sa level sa tubig sa creek diin asa nakapalagan ang biktima.
Sa imbestigasyon sa kapulisan, walay nakitang mga samad sa lawas niini ug padayon pang ginasuta ang hinungdan sa kamatayon sa biktima nga gidala na sa punerarya sa Brgy. Lasang ning dakbayan.
RadyoMaN Renz Barbarona
