Patayng lawas sa 2 brutal nga gipatay nga pulis sa calinan i-awtopsiya

Parehong tadtad sa mga samad tinigbasan ug pinusilan ang patayng lawas sa mga pulis nga sila PSMS Tito Didal Lague and PCpl Mark Anthony Elman Corsino, nga brutal nga giatake samtang garesponde sa tawag tungod sa komosyon sa Purok 4, Barangay Lacson, Calinan District, Davao City.

Sa interbyu sa DXDC kang Police Major Ricky Obenza, Station Commander sa Calinan Police Station ipailawom sa autopsy ang duha ka mga gipamatay niini nga mga personahe.

Matud ni Obenza, multiple murder, direct assault ug uban pang kaso ang ipasaka batok sa suspek nga si Rico Masacay nga nadakpan atol sa hot pursuit operation.

Gibutyag niini nga ang napatay nga suspek nga si Benao Landas ug si Masacay maong nitigbas, nangilog sa mga armas sa mga police officers ug gipabuto usab nila ngadto sa mga biktima.

Nalupig ang mga pulis nga igo rang niresponde sa kagubot sa nasangpit nga lugar dihang ang maong mga suspek giingong gisudlan ug dautang espirito ug daw dili madutlan og bala.

Gikondena sa Police Regional Office 11 ug Davao City Police Office ang brutal nga pagpatay sa duha ka mga biktima ug mga samdang mga personahe sa Calinan Police Station sa mangilngig ug makahingangha nga krimen.

RadyoMaN Aimee Guinita