Naghulat pa ang kapulisan sa lungsod sa Sultan Naga Dimaporo, Lanao del Norte, nga adunay pamilya nga mo-ila og mokuha sa patay’ng lawas sa lalaki nga nakit-an, buntag niadtong Biyernes, Agosto 16, sa may highway sa Barangay Payong, sa nasangpit nga lungsod.
Matud pa ni Police Captain Javier Tanog, hepe sa SND Municipal Police Station, nakit-an ang maong lawas nga adunay usa ka samad pinusilan sa iyang agtang.
Adunay mga identification cards nga nakuha gikan sa iyang bulsa, sama sa ID nga Hugpong Ng Pagbabago Davao del Norte Chapter, duha ka PHILHEALTH ID, student ID sa tunghaan nga Liloan National Technical Vocational High School ug usa ka security officer ID.
Apan, lahi-lahi ang mga pangalan sa maong mga identification cards.
Nagsuot kini og blue nga t-shirt, itom nga jogging pants ug puti nga tsinelas nga adunay blue nga strap.
Gibana-bana nga aduna kini gitas-on nga 5’4” hangtud sa 5’5”.
Miingon si Tanog nga posibleng gilabay lang ang maong patay’ng lawas sa dapit tungod kay gawas nga walay nakit-ang basiyo sa bala, wala usay traces sa dugo sa kalsada.
Anaa kini karon nahimutang sa Gamalinda Funeral Homes sa lungsod sa Maranding, Lala, Lanao del Norte.
PHOTO COURTESYSND Municipal Police Station
