Patay’ng lawas sa tanang biktima sa landslide sa Monkayo, nakuha na sa otoridad

Davao Oriental – Na-retrieve na sa Monkayo Municipal Disaster Risk Reduction and Management Office (MDRRMO) ang ulahing na-missing sa landslide sa Mt. Diwata, Diwalwal, Monkayo, Davao de Oro nga mao si Rommel Gumatin.

Sa interview sa DXDC RMN Davao kang Jergrace Cabag, ang Public Information Officer sa Monkayo, iyang gikumpirmang ala una sa hapon niadtong Enero 20, 2024, na-pull out nila ang lawas ni Gumatin sa pinakaubos nga bahin sa midahiling yuta.

Kahinumdoman nga una nang nakuha ang patay nga lawas sa asawa niining si Catherine Gumatin ingon man ang ilang lima ka mga anak lakip na ang lain pang mga biktima nga sila Agnes Bitoon, Ritchell Rebuldad ug Elvera Saldua. Ug ang usa ka survivor nagpabiling anaa sa balay tambalanan.

Samtang gikumpirma usab ni Mayor Lito Cabalquinto sa iyang Facebook post nga nakuha na ang lawas sa usa ka minerong patay sa landslide sa Barangay Tandik, Maragusan, Davao de Oro.

Ang biktima giilang si Kayle Dacer Muñoz, 23 anyos.

Sumala pa nga miabot og 18 ka oras ang pag-recover sa biktima gikan sa 8-10ft. nga gilawmon sa yuta.

Padayon usab ang pagtabang sa lokal nga panggamhanan sa Davao de Oro alang sa pagpahilona sa mga biktima.

RadyoMaN Ivy Parido