Gibutyag ni DCPO Spokesperson Police Major Catherine Dela Rey nga dunay nadugang sa mga gamit nga dili pwedeng dalaon sa mga tawo nga mutan-aw sa mga aktibidad isip kabahin sa mas gipahugtan nga security measures aron mas luwas ang mga Dabawenyo sa pagselebrar sa Araw ng Dabaw karong tuiga.
Gikanayon ni Dela Rey nga gidili na ang pagdala og payong ug stuffed toys sa mga event areas ilabi na sa parada sa Marso 18, 2023.
Gipasabot sa opisyal ang mga rason ngano ilang gilakip ang maong mga butang tungod puwedeng magamit nga hinagiban ang talinis sa payong ug posibleng sudlan og improvised explosive device ang stuffed toys sa mga tawong nga naghunahuna og dautan atol sa selebrasyon.
Busa gidasig ni Dela Rey ang mga Dabawenyo nga likayan ang pagdala sa mga butang nga gidili sama sa canister, backpack, hinagiban, ug uban pa aron sa ingon dili sila mabalda sa ilang pag-adto sa mga event venues sa dakbayan sanglit usa lang ka entrance ug exit ang imuntar sa mga kalingawan gawas sa parada nga abli ang tanang agianan sa mga contingents sa sentrong bahin sa siyudad nianang panahona.
Subay ani, gahapong adlawa gipahigayon ang send-off ceremony ug kapin 11,000 ka security personnel nga magbantay sa entero kalihukan sa Araw ng Dabaw karong buwan sa Marso.
RadyoMaN Joel Viray
