Ipinagmamalaki ngayon ng bayan ng Balaoan ang bagong PBA-standard na solar-powered basketball court at ang kauna-unahang air-conditioned bus stop na parehong napapakinabangan na ng mga residente sa La Union.
Idinesenyo ang covered court ayon sa pamantayan ng Philippine Basketball Association, kaya angkop ito sa malalaking liga at opisyal na palaro. Gumagamit din ito ng solar power system upang maging mas matipid sa enerhiya at mas makakalikasan ang operasyon.
Samantala, malaking tulong naman sa mga commuter ang air-conditioned bus stop, lalo na tuwing tag-init, dahil nagbibigay ito ng mas maayos at komportableng silungan habang naghihintay ng masasakyan.
Ayon kay Charlie Fedencio Balanon, Municipal Planning and Development Coordinator ng Balaoan, hindi ipinagkakait ng pamahalaang lokal ang paggamit ng mga pasilidad.
Dagdag pa niya, ang pondo para sa mga proyektong ito ay nagmula sa bahagi ng bayan sa tobacco excise tax na inilaan para sa mga programang pangkaunlaran.
Bukod sa mga nabanggit na pasilidad, inilaan din ang isang bagong playground na nagsisilbing ligtas at maayos na espasyo para sa mga bata upang makapaglaro at makapaglibang.
Sa kabuuan, ipinapakita ng mga proyektong ito ang layunin na mapabuti ang imprastraktura at kalidad ng pamumuhay, hindi lamang para sa mga taga-Balaoan kundi pati na rin sa mas malawak na komunidad. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
