PBMA Support Group>Ecleo mopakita ra sa sakto na panahon!

77

Mopakita ra sa sakto na panahon sanan lugar an konbiktado sa kasong Parricide na si PBMA Supreme Master Ruben Ecleo Jr. Ini amoy pamahayag sa PBMA Support Group Chairman Ret. P/Sr. Inspector Atilano Fabella sa interview nan RMN Surigao kuman buntag. Sumaya pa ni Fabella na ini ra sa Pilipinas si Ecleo Jr. sanan jaun sa marajaw an panglawas. Dugang pa niini na mihimo kuman an legal team ni Ecleo sa tanan legal na pamaagi para mapruybahan an ija kainosente sa parricide case. Nagtoo isab an PBMA support group na dako na pagtraydor an taghimo sa mga kanhi abogado ni Ecleo na sila Atty Orlando Salatandre Jr.og Atty Giovanni Mata tungod kay imbis depensahan an ila Master , mga bakak sanan hinimo himo na mga ebedensya an taghatag sa korte rason sa ija pagka konbikto sa amo na kaso. Kahinumdoman na tuig 2011 nakonbikto sa kasong Parricide si Ecleo tungod sa pagpatay sa ija kaugalingon na asawa na si Alona pero hangtud kuman waya pa maserbisyohi an nahimong decisyon sa korte na mapriso ini sa tibuok nija kinabuhi (reclusion perpetua) o bana bana 30 ka tuig na pagkapriso.

Facebook Comments