Davao City – Nagpadayon karon ang pag apod-apod og ayuda sa Department of Agriculture (DA-XI) alang sa kwalipikadong coconut farmers nga labing naapektuhan sa pandemya hatud sa Coronavirus Disease 2019 (COVID-19).
Atol sa One Davao on COVID-19 Virtual Presser, gibutyag ni Juvy Alayon, Acting Regional Manager III sa Philippine Coconut Authority (PCA-XI), nga makadawat ang qualified beneficiary og P3,000 cash assistance ug P2,000 nga kantidad sa food assistance gikan sa programa sa DA nga Cash and Food Subsidy for Marginal Farmers and Fisherfolk (CFSMFF) nga usa ka one time subsidy.
Gibutyag ni Alayon, ang kwalipikadong benepisyaryo niini mao kadtong mga nag-uma og .5 hectares hangtud sa duha ka ektarya, wala nagincome og kapin P21,000 ug walay laing income.
Mamahimo usab nga makig-alayon ang usa ka mag-uuma sa PCA field officers sa ilang lokalidad aron masayran ug mapasabot ang criteria sa maong programa.
“Among gina-awhag ang mga mag-uuma sa lubi nga duola ninyo ang inyohang mga field officers diha sa PCA aron mapasabot sa inyoha (ang programa) tungod kay duna lay criteria nga among gisunod,” saysay ni Alayon.
Sa pagkakaron, naka distribute na ang departamento og 24,000 QR Codes nga maoy gamiton sa qualified coconut farmers sa pag-claim sa ayuda hangtud sa Abril 30, 2021.
RadyoMaN Kirby Manzon
