Sa interbyu sa RMN Davao kang Commodore Agapito Bibat, Coast Guard District Southeastern Mindanao Commander, wala pa sila nihunong sa pagpangita sa mga na-missing ug nanghinaot nga ma-locate kini sa kadagatan nga buhi.
Sumala ni Bibat nga gihatod na ngadto sa Brgy. Calumpang, General Santos City ang tulo ka mga na-retrieve nga cadaver sa namatay nga mga crew ug ang 14 ka mga survivors.
Sumala sa na-rescue nga crew, pasado alas-12 sa kadlawon kalit silang nakasinati’g pag-usab sa sitwasyon sa kadagatan ug dagkong balod hinungdan nga naunlod ang nasangpit nga fishing boat.
Gipahibalo na sa kumpanya sa barko ang mga tagtungod sa 23 ka mga crew nga sakay sa naunlod nga bangkang panagatan.
Gibutyag sa Philippine Coast Guard nga ang naunlod nga fishing boat gipanag-iyahan sa OGDI Fishing Company nga nakabase sa General Santos City.
Gihulat pa sa DXDC ang OGDI Fishing Company ug PCG nga magpagula og opisyal nga talaan sa mga pangalan sa 3 ka crew nga namatay, 6 ka missing ug sa 14 ka mga rescued kun mga survivors.
RadyoMaN Aimee Guinita
