Davao City- Walay natalang mga insidente sa kadagatan ang Coast Guard Southeastern Mindanao sa pagpatuman sa Oplan Byaheng Ayos: Undas 2021 sukad niadtong Oktobre 29, 2021 kutob Nobyembre 3, 2021.
Sa interbyu sa RMN Davao kang Capt Gary Dale Gimotea, Deputy Commander, Coast Guard District Southeastern Mindanao, nahimong hapsay ug luwas ang Southeastern Mindanao atol sa Kalagkalag.
Matud ni Gimotea, base sa IATF Guidelines, hugot gihapong gipatuman ang 50% capacity sa tanang sakyanang pandagat.
Niadtong Nobyembre 1, 2021 nakatala og 8,000 ka mga inbound ug outbound passengers sa entero Southeastern Mindanao, samtang dul-an 7,000 niadtong Nobyembre 2, 2021.
Aron masigurong walay mga drowning incident lakip sa gipatrolyahan sa PCG ang mga beach resorts ug mga coastal barangays.
Nanawagan si Gimotea sa katawhan nga magdoble amping samtang gapahigayon og aktibidad kauban ang ilahang mga pamilya.
RadyoMaN Aimee Guinita
