Gin-athag ni PCI Kennith Bermejo, team leader sang Regional Drug Enforcement Unit (RDEU-6) nga wala sila sang may ginpanguha nga gamit sang mga boarders kadungan sang buy bust operation sa balay sang pamilya Soliva sa Bankers Village, Brgy. Quintin Salas, Jaro kagab-i, Septyembre 12.
Ang pahayag ginhimo ni Bermejo matapos nagreklamo ang mga boarders nga naga-arkila sa boarding house sang pamilya Soliva kag gin-alegar nga ginpang-ukay sang mga operatiba ang ila kwarto kag nagkaladula ang ila mga gamit kag kwarta.
Suno kay Bermejo nga sang ginpatigayon ang operasyon, ginpangtipon ang mga boarders sa kamalig kag temporaryo nga ginconfiscate ang ila mga cellphone agud indi madistract ang operasyon kag ginbalik man sa mga ini pagkatapos .
Dugang pa ni Bermejo nga ila ginsid-ing ang mga kwarto sang ila ginpangita ang subject sang operasyon nga si Clint Soliva.
Paathag ni Bermejo, indi sila makapang-ukay tungod wala sila sang search warrant kag buy bust operation ang natabo.
(photo from web)
