Pahugtan ang gipatuman nga palisiya sa paghinlo sa buhatan, kapolisan ug komunidad ingon man ang tanang matang sa kriminalidad ilabina ang iligal nga droga ug pagsupil sa mga dautang pundok.
Kini maoy gipalanog ni PCol. Giovanni Hycenth H Caliao, Acting Provincial Director atol sa mensahe niini sa gipahigayon Turn-Over of Command Ceremony sa Zamboanga del Norte Police Provincial Office sa Camp Hamac, Sicayab Dipolog City.
Nagkanayon pa kini nga iyang pagatutokan ang mga nagkalain-laing iligalidad ug paghinlo sa kapolisan, komunidad ubos sa kamanduan ni PGen Guillermo Eleazar.
Gibutyag usab niini nga iyang ipahigayon ang spot inspection sa mga kuerpo sa kapolisan sa bisan unsang oras aron masuta kung mituman sa mandato sa CPNP.
Naghangyo usab si Caliao sa mga kadagkuang opisyales sa mga pangagamhanan, stakeholders, mga membro sa prensa, katawhang publiko lakip na ang mga membro sa kapolisan sa hugot nga suporta, pakiglambigit sa mga programa sa kapolisan ug pakigbatok sa mga krimen.
Si PCol. Giovanni Hycenth Caliao usa ka SAF Commando diin gikan kini naghepe sa Quezon Province, Quezon City Northern Police District, nahimo usab nga Regional Battalion Commander sa Zamboanga Peninsula diin migradwar sa Philippine National Police Academy ubos sa Tanglaw-Lahi Class 99.
Sa pikas nga bahin, malipayon usab nga mobiya si PCol Ronald Briones sa probinsya sa Zamboanga del Norte human kini milingkod isip provincial director sulod sa duha ka tuig.
Sumala pa nga dili niini malimtan ang tanan nga mga kasinatian sa iyang pagserbisyo lakip na ang suporta sa tanang mga opisyales sa lokal ug probinsyal nga pangagamhanan, mga stakeholders ilabina ang mga staff sa ZNPPO.
Subay niini, iyang gihangyo usab ang mga katawhan nga suportahan ang tanan nga mga programa ug kamanduan sa bag-ong milingkod nga provincial director aron mapatunhay ang hapsay ug kamalinawon sa tibuok probinsya sa Zamboanga del Norte. (chichai)
