Pormal na nga nagpungko si PCSupt John Bulalacao bilang bag-o nga Regional Director sang Police Regional Office -6.
Sa Turn Over of Command nga ginhiwat kaina sang aga sa Police Regional Office 6 , ginpahayag ni Bulalacao nga iya padayunon ang maayo nga hinimuan ni anay PRO-6 Director PCSupt. Cesar Hawthorne Binag.
Ginpahayag ni Bulalacao nga kon indi man niya malapawan ang maayo nga hinimuan ni PCSupt. Binag, nagalaum siya nga iya man lang ini matupungan.
Sa iya pagpungko bilang bag-o nga Regional Director sang PRO-6, ginpaandaman ni Bulalacao ang mga pulis nga indi ang mga ini magtext samtang nagaduty kag yara sa pampubliko nga lugar, magpanigarilyo samtang nagaduty, magserbe nga bodyguard sa mga pulitiko , ginadili-an man ang mga ini sa bulangan ukon mag-intra sa tanan nga sahi sang illegal gambling ilabi na ang illegal nga droga.
Nahibaluan nga nagserbe bilang spokesperson sang Philippine National Police si Bulalacao antes siya nagtal-os kay anay PRO-6 Director PCSupt. Cesar Hawthorne Binag.
Si Binag ang gin-promote bilang director sang Directorate for Information and Communications Technology sa Camp Crame.
