Davao City – Ginamonitor karon sa Philippine Drug Enforcement Agency kun PDEA XI ang unom ka Barangay officials sa rehiyon XI nga naapil sa listahan ni Pangulong Rodrigo Duterte nga nalambigit sa iligal nga droga.
Kini ang gibutyag ni (PDEA) Director General Aaron Aquino diin lakip ang unom ka brgy officials sa region XI sa 87 ka mga pulitiko sa nasud nga gitutukan karon sa buhatan tungod sa pagkalambigit sa iligal nga droga lakip na diha ang mayor, vice mayor congressmen, board members ug vice governor.
Sumala sa report gikan sa PDEA nga ang ubang Brgy. officials nag gikan sa Davao del Sur, Davao Oriental, Davao del Norte ug Davao City.
Subay niana, nagbahad si PDEA XI regional director Antonio Rivera ngadto sa mga narco politicians nga walay pagpanuko ang buhatan aron masikop ang bisan kinsang malambigit sa iligal nga droga.
Sa datus sa PDEA XI gikan sa bulan sa Enero ning tuiga, anaa sa 121 ka drug operations ang napahigayon, 148 ang nadakpan , 173 grams nga shabu ug kapin 2 kilo nga marijuana ang narekober diin sa 538 ka brgy. sa rehiyon XI nga apektado sa iligal nga droga, 146 niini ang gideklara nga drug free.
RadyoMaN Don Pulayao
