Davao City – Taliwala sa risgo nga gi-atubang sa mga operatiba sa Philippine Drug Enforcement Agency (PDEA-XI) ning panahon sa COVID-19, nagpadayon gihapon ang hugot nilang kampanya kontra sa pagkuyanap sa illegal drugs.
Sa interbyu sa DXDC RMN Davao kang PDEA-XI spokesperson Noli Dimaandal, gisugilon niini nga gituman gayud nila ang mga health protocols samtang nagpahigayon sa mga drug operations.
“Nagasunod ‘ta sa protocol…Naa ‘tay mga gina-priority nga mga drug personality. Gina-una nato ‘tong mga barangays ug areas nga dili kaayo affected sa COVID,” matud ni Dimaandal.
Matud sa tigpamaba, una ibalhin sa BJMP, kinahanglang ma-test una ug masegurong luwas sa COVID-19 ang nasangpit nga mga PDLs.
“Before nato isulod sa jail, atoa nang gina-conduct-can og mga test kay basi’g naa siyay makatakod nga sakit unya madamay pud tong ubang mga PDL. Gani, ang BJMP dili pud sila mudawat og PDL kung dili siya ma-conduct-can og testing…Isa man gud na siya sa requirement sa court para ma-transfer ang atong PDL sa BJMP,” dugang sa spokesperson.
Basi sa gipahigayong COVID rapid testing niadtong June 11, ninggula nga walay bisan usa ka PDL nga nag-positibo sa coronavirus sulod sa PDEA-XI detention facility.
Usab gipailawom ang tanang PDEA agents sa COVID-19 test ug gimanduan nga sundon ang health protocols alang sa seguridad sa tanan.
RadyoMaN Aimee Guinita
