Davao City – Hugtanong nagpasidaan karon ang Philippine Drug Enforcement Agency kun PDEA XI ug Davao City Police Office ngadto sa tanang mga party-goers o mga teenagers nga dili magkumpyansa subay kini sa nahitabong kamatayon sa usa 19 anyos atol sa pre-Sinulog concert sa Cebu niadtong Enero 19 tungod sa gituohang drug overdose.
Gibutyag ni PDEA XI spokesperson Noli Dimaandal nga dili magpataka og inom o kaon ilabina kung ang mga kauban dili nila mga kasaligan o kaila.
Pahimangno ni Dimaandal nga katong mga gibyaan nila nga mga ilimnon dili na angay balikan pa kay posibleng butangan pa kini’g party drugs kun ecstasy.
Sumala ni Dimaandal nga makamatay kining maong klase usab sa droga.
“This can cause death sa part sa user because kay considered ni siya as stimulant and hallucinogen type of drug so paspas kaayo ang palpatation sa atoang heart,” matud ni Dimaandal.
Sa pikas bahin, gibutyag ni DCPO head PSSUPT Alexander Tagum nga walay report nga adunay party drugs o ecstacy dinhi sa syudad.
Gibatbat ni Tagum nga mudos sa mga adunay planong dautan nga sagulan og droga ang ilimnon o bin ba kaha pagkaon sa ilang mga biktimahon.
“Mao niy pamagi sa mga gustong maka-score butangan nila og ecstasy. Pwedi nato ni malikayan kung naa moy nabiyaan nga drinks o pagkaon ayaw ninyo na na baliki kay pasabot wala namoy kontrol ana,” pasidaan ni Tagum sa mga kabataang hilig mag-party.
Gidasig sa mga awtoridad ang tanang mga ginikanan nga i-monitor ang tanang mga tambungan nga aktibidad sa ilahang mga anak.
RadyoMaN Aimee Guinita
