Davao City – Lima ka mga personahe sa Bureau of Jail Management and Penology (BJMP) sa Rehiyon 11 ang nalambigit karon sa illegal drug trade.
Kini mao ang gikumpirma ni Philippine Drug Enforcement Agency (PDEA)-XI Regional Director Antonio Rivera atol sa nahitabong AFP-PNP Presscon sa adlaw’ng Miyerkules diin sumala pa pulos kini mga jail guards.
Hinuon wala gipanganlan ni Rivera ang maong mga opsisyal apan gisumitir na ang mga pangalan niini ngadto sa BJMP regional director alang sa tukmang aksyon diin kini posibleng ma-relieve sa katungdan ingon man mare-assign sa ubang mga jail facility dinhi sa rehiyon.
“I believe nag conduct na din sila ng investigation regarding the possible involvement of the same. Yung sa amin naman na-receive lang naming yung information and in courtesy we gave back the information sa RD ng BJMP for proper action ng agency which I believe na ginagawa din nila,” segun niini.
Pagpasabot sa director sa PDEA-XI nga walay labot sa lima ka mga namonitor ang nadakpang Provincial Administrator sa BJMP Davao del Sur nga si Jail Chief Inspector Roman Hernandez atol sa gilusad nga Joint Task Force Greyhound Operation ug random drug testing niadtong Pebrero 23, 2019.
Sa pikas bahin, gibutyag ni BJMP-XI spokesperson Jail Insp. Edo Lobenia nga dili nila ginatolerate ang maong binuhatan sa ilang mga personahe ug nagkanayon nga kanunay sila nagapahigayon og random drug testing diin sa pagkakaron usa na ka personahe sa Compostela Valley ang ilang gi-dismiss human madakpan sa buy-bust operation ingon man samtang laing upat ka mga personahe ang gipasakahan og kasong administratibo.
RadyoMaN Jason Amisola
