Davao City – Sagad sa mga rason nganong malambigit ang kabatan-unan sa iligal nga droga mao ang problema sa pamilya ug ang ilahang curiosity niini.
Sa pakighinabi sa DXDC RMN Davao kang Philippine Drug Enforcement Agency (PDEA) XI Spokesperson Noli Nephi Dimaandal, ang mga nasangpit nga rason ang sagad nilang madungog sa mga kabatan-unang madakpan sa mga operasyon nga nagagamit ug nagapayuhot og iligal nga droga dinhi sa syudad sa Davao ug sa rehiyon XI.
Bisan pa man hugot na ang kampanya batok iligal nga droga sa milabyang katuigan, sa pagsulod sa tuig 2018, dunay gihapoy nadakpan nga kabatan-unan sama sa naharang nga estudyante sa checkpoint sa Taskforce Davao nga nakuhaan og marijuana.
Tungod niini, mas gipakusgan sa ahensya ang pagpahigayon og proper education ug lectures kabahin sa iligal nga droga ilabi na ngadto sa mga kabatan-unan, dili lang sa eskwelahan lakip na sa kabarangayan dinhi sa rehiyon.
“That’s the reason why ang (PDEA) we intensify the human reduction campaign program, kanang pag- conduct og lectures not only sa schools, apil sa work places and barangays. The very effective tool against sa drug abuse is proper education,” sigun ni Dimaandal.
Gani mas gipaubos pa nila ngadto sa elementarya ang pagpahigayon og lectures sama sa Grade 4, 5 ug 6 aron sa ing-ana nga estado mahibaloan na nila ang dili maayong epekto sa paggamit og illegal drugs.
“Kasi ang bata o ang isa ka tao well-informed, well-educated kung unsa ang effects sa illegal drugs, bisan pa siguro ipanghatag ng drugs diha, as long as they know nga makadaut and mahibal-an ang consequences, so dili na gyud na sila magapil-apil ana nga butang,” dugang ni Dimaandal.
Sama sa tambag ni Presidente Rodrigo Duterte sa tanang Pilipino, panawagan karon sa ahensya ilabi na ngadto sa kabatan-unan nga sa mga nagsugod og gamit sa gidiling droga, kini kinahanglan undangon na samtang sa mga wala pa, dili gayud musulod aron ang mga pangandoy sa kinabuhi dili madaot tungod lang sa daling kalipay nga hatag sa iligal nga droga.
RadyoMaN Renz Barbarona
