Davao City – Mas pakusgan karon sa Philippine Drug Enforcement Agency 11 (PDEA-XI) ang ilang mass reduction human masikop ang numero unong High Value Target sa ilang listahan.
Kini maoy gibutyag ni PDEA XI Regional Director Antonio Rivera diin matud niini nga naga-conduct na sila og lectures ingon man drug testing sa mga opisina sa gobyerno lakip ang private companies subay sa ilang adbokasiya nga drug-free workplace.
Atol sa gilusad nga buy-bust operation sa PDEA XI ug kapulisan, nasikop alas 7:10 kagabii si JO3 Roy Aguinaldo ug ang asawa niini nga si Maria Myrlene Aguinaldo nahitabo sa Purok Mabuhay 2 Brgy, Binuangan, Maco Compostela Valley Province.
Saysay ni Rivera, nagabaligya og iligal nga druga si JO3 Aguinaldo sulod sa BJMP-Comval ngadto sa mga detainee gani niabot ang impormasyon sa intelligence community hinungdan sa paglusad og operasyon.
Nakuha sa mga dinakpan ang kapin kun kulang pito ka gramos sa gituohang shabu nga nagkantidad og P47, 600.
Dugang sa Regional Director sa PDEA XI nga ipasaka nila ang kasong kalapasn sa Section 5 ug 11 Article 2 sa RA 9165 kun comprehensive dangerous drugs act of 2002 karong adlawa ug balik i-priso sa Maco Municipal Police Station kun asa kini na lugar nadakpan.
RadyoMaN Jason Amisola
