Sa pakighinabi sa DXDC RMN Davao kang Bernard Bravo, responder sa Davao del Sur PDRRMO, iyang gibutyag nga sa report sa Sta. Cruz Municipal DRMMO, natala ang baha sa Barangay Pitogo, Patulangon, Langan, ug uban pang kasikbit nga Barangay, tungod sa kusog nga ulan ug tubig gikan sa bukid nga bahin.
Sa post sa MDRRMC Kiblawan, misulod na sa kabalayan ang tubig baha diin miabot na sa hawak sa tawo ang level sa tubig.
Sa post ni Jennifer Ampoloquio, makita nga halos wala nay dalang maagian tungod sa pagbaha nga nasinati sa lugar, hinungdan nga na-stranded na usab ang mga motorista.
Samtang sa video post ni Josel Macahilo, makita nga taas na ang level sa tubig sa dagat duol sa iyang panimalay rason nga mibakwit na ang iyang pamilya.
Pahimango sa PDRRMO personnel sa publiko, kinahanglan lamang nga mag-igmat ug kung mahimo muadto dayon sa mas luwas nga lugar panahon sa emerhensiya.
“Kung paminaw nila ang ilahang nahimutangan peligro kung mudako ang tubig, mag-preemptive evacuation nalang sila. Muadto sa ilang kaparyentehan, silingan nga naa sa mga elevated area,” sulti ni Bravo.
RadyoMaN Kirby Manzon
