PDRRMO Davao Oriental, walay natalang damyos sa kusog nga aftershocks

Davao City – Gikumpirma sa Provincial Disaster Risk Reduction and Management Office (PDRRMO) Davao Oriental nga walay natalang damyos ang kusog nga aftershock human sa magnitude 6.8 nga linog sa Lingig, Surigao del Sur alas 06:22 sa buntag niadtong Sabado, August 3, 2024.

Sa interview sa DXDC RMN Davao kang Ric Lubiano, PDRRMO personnel, iyahang gisulti nga base sa pag-assess sa otoridad, wala silay nadawat nga report nga dunay naguba nga balay o gambalay tungod sa pagtay-og.

Sa datos sa PHIVOLCS, alas 7:36 sa buntag gitay-og magnitude 5.0 nga linog ang Cateel. Samtang ang Baganga gitay-og og 4.6 magnitude alas 7:44 ug 6.0 magnitude alas 9:38 sa buntag.

“So far, kadtong tulo ka linog diri sa banda namo sa Davao Oriental, gi-check namo ang mga LGU (Local Government Unit) namo, wala may reported damage structure,” sulti ni Lubiano.

Gipasabot sab sa PDRRMO personnel nga dunay LGU sa Davao Oriental nga boundary lang sa Surigao, rason nga posible gayud nga magbaton og aftershocks kung linogon og kusog ang silingang probinsya.

RadyoMaN Kirby Manzon