Davao City – Suportado sa Mindanao Peace Council ang gihingusgan nga Localized Peace Talks kansang nagtingoha nga mahunong na ang kaguliyang nga hinimoan sa teroristang CPP-NPA-NDF.
Gipalanog ni MPC Secretary General Vince Molejon ang katarungan nga dako og ikatabang sa paghuman sa insurhensiya sa nasud partikular sa rehiyon onse ang localized peace talks.
Matud niini nga og sa lokal himoon ang hisgutanang pangkalinaw, mas dali mapaabot sa mga NPA nga naglihukan sa matag lokalidad ang ilang mulo batok sa gobyerno.
Ug niini, hayag ang kahigayonan nga aduna dayon maselyohan nga kasabutan ug solusyon ang duha ka kampo nga mahimong dalan unya sa pagkab-ot sa kalinaw nga gipangandoy sa kadaghanan nga wala mabuhat sa GRP Panel ug sa NDFP.
Nasayran, nagporma og bag-ong panel si peace initiative of the Presidential Peace Adviser Process Carlito Galvez Jr. aron ma-supervised sa matigayon nga localized peace talks.
Sukad sa 2016, upat na kahugnaan sa peace talks ang nabuhat sa GRP ug sa NDFP apan pakyas gihapon sila sa pagselyo sa kasabutan paingong sa kalinaw ug kalamboan nga mag-human unta sa insurhensiya sa nasud.
Sayo aning tuiga, gibungkag ni Presidente Rodrigo Duterte ang GRP panel timaan nga hingpit na gisirad-an ang pultahan sa peace talks alang sa mga komunista gumikan ilang pagkatraydor.
RadyoMaN Joel Viray
