Kapin libo ka mga Maranaw, nga gilangkuban sa mga internally displaced persons (IDPs) ug mga religious leaders, ang nahatagan og pagtugot niadtong Biyernes, Nobyembre 1, nga makasulod sa ground zero o most affected area (MAA) sa Marawi City.
Kini aron mohimo og congregational Friday prayer o Jumaat prayer, nga labing unang nahitabo human ang lima ka bulang giyera batok sa mga terorista niadtong tuig 2017.
Matud pa ni Musa Sultan, presidente sa Saksi Islamic Radio Forum nga maoy nag-organisa sa maong panagtapok, nga gi-uluhan og “Saksi Prayer for Peace”, nga usa sa ilang gi-ampo mao ang mga kalag niadtong namatayang mga Kristiyanos sulod sa ground zero, ilabina kay gi-obserba sa mga Katoliko ang Adlaw sa mga Santos ug Adlaw sa mga Kalag ang Nobyembre 1 ug 2.
Walay mga pamilya nilang nakahigayon sa pagbisita aron managkot ug maghalad og bulak tungod sa ilang matag rason sa kinabuhi.
Apan gawas niini nga intensiyon, gi-ampo sa mga residente nga makabalik na sila sa ilang mga lugar sa most affected area nga walay kondisyon tungod kay sila man ang nanag-iya niini.
Una nang gi-anunsiyo sa Task Force Bangon Marawi nga mahimo nang makabalik ang matag residente kung makumpleto ang mga dokumento nga gipangayo sa gobyerno aron pagsiguro nga ang magtukod mao gayud ang tinood nga tag-iya sa luna.
Ilaha usab gi-ampo nga dili ipadayun sa gobyerno ang pagtukod og lain pang kampo sa militar sulod sa ground manila ang kasamtangang Kampo Ranao nga naa nahimutang tapad sa kapitolyo.
Gipasabot sa gobyerno nga temporaryo ang maong kampo. Ipahimutang kini aron dunay magbantay sa mga trabahante sulod sa ground hangtud sa tuig 2021 ug tangtangon kini kung matapos na ang rebuilding and rehabilitation.
*video credits to RadyoMan Divina Suson
