PEACETALK TALI GRP UG CPP NPA NDF GIPABORAN SA USA KA POLITICAL ANALYST

Davao City – Usa ka positibo nga lakang ang paglingkod pag-usab sa lamesa aron hisgotan ang hinabing pangkalinaw sa gbyerno sa Pilipinas ug Teroristang CPP-NPA-NDF.

Nakita na daan sa usa ka Political Analyst ug kasamtangang Barangay 76-A Kagawad Randy Ponteras, sa administasyon ni Presidente Bongbong Marcos Jr., matuldokan na sa hingpit ang giyera tali sa mga sundalo sa nasod ug teroristang CPP-NPA-NDF nga kapin 50 ka tuig, wala pa masulbad hangtod karon diin liboan na ka kinabuhi ang mga nakalas, sukad pa niadtong dekada 80 ug hangtod sa kanhi Administrasyong Duterte.

Nanghinaut si Ponteras, undangon sa gobyerno ang giyera batok sa teroristang CPP-NPA-NDF, isip pagpakita sa sinseridad samtang himoon ang peacetalk, aron sa ingon matuldokan na ang terorismo nga maoy dangan sa kalinaw ug kalamboan diin sa lima ka dekada napihigan niini ang Pilipinas.

Dugang ni Ponteras, kini na ang tsansa sa kagamhanan aron i-abante ang peacetalk, samtang huyang pa ang puwersa sa teroristang CPP-NPA-NDF, isip bunga sa all-out-war nga gideklara ni Kanhi Pangulong Rodrigo Duterte lima na katuig ang nakalabay, ilabi na nga dili na maihap ang mga nangamatay ug pagkahugno sa ekonomiya.

RadyoMaN Joel Viray