Davao City – Nidumili karon sa pag-komento si Peace Process Adviser Jesus Dureza sa ‘Red October’ nga plano sa CPP-NPA-NDFP aron pahugnoon ang panggamhanan ni Pres. Rodrigo Duterte.
Sumala ni Dureza nga wala sa iyaha ang hurisdiksyon aron magkomento sa ‘Red October’ plot sa mga komunista batok sa gobyerno karong bulana o dili ba kaha sa buwan sa Nobyembre.
Nagdumili usab si Dureza sa pagbuhi og pamahayag mahitungod sa pagkatanggal kang DOLE Undersecretary Joel Maglungsod gikan sa katungdanan.
Malaumon gihapon ang mao nga opisyal nga mapadayon gihapon ang peace process luyo sa wala’g tuo nga labayay og hait nga mga bahad tali ni Duterte ug ni Jose Maria Sison sa rebeldeng pundok.
Hinoon gitin-aw pa niini nga walay natigayon nga backdoor channeling talks tali sa GRP panel ug mga Leftists aron banhawon ang naputol nga hinabing pangkalinaw.
Inay magpaabot lamang matud pa sila sa direktiba ug kamandoan sa pamuno-nasud kung kanus-a pag-usab sila magsugod sa pakigpulong sa mga kadagkuan sa rebel group.
RadyoMaN Joel Viray
