Davao City – Kinahanglan usbon na ang 1987 Philippine Constitution aron ipahimutang ang bag-ong sistema’ng panggobyerno nga pederalismo aron makatilaw na og tinuod nga kalamboan ug kalinaw ang Pilipinas.
Ang bag-ong political set-up nga gipanday sa panahon ni Cory Aquino nahimong dangan sa pag-uswag sa ekonomiya ug pag-abante sa Pilipinas sa silingang mga nasud sa asya ug sa kalibutan.
Human milampos si Cory Aquino sa pagtukod sa 1987 Constitution ang lig-on nga ekonomiya sa panahon ni Pres. Ferdinand Marcos nahugmak ug wala na gyod nakabangon pa.
Sukad nakalingkod si Cory sa gahom ang nag-unang negosyo sa pilipinas gikontrolar sa iyang mga alipuris ug kaalyado sama sa oligarch diin nawala na ang himsog nga kumpetisyon sa negosyo.
Segun ni Causcus Mindanao Convenor June Aparece Jr. nga kun buot nato mabalik ang lagsik ug lig-on nga ekonomiya sa atong nasud angay nang ilisan ang balaod karon paingon sa pederalismo nga sistema.
Matud ni Aparece, pinaagi sa pederalismo mawagtang na unya ang manipulasyon ug pagkontrolar sa mga oligarch sa dagan sa negosyo sa Pilipinas.
Ang pederalismo maghatag og kahigayonan sa mga langyaw’ng tigpatigayon nga makasulod sa nasud aron magyabo og dagkong capital alang sa ilang mga negosyo nga sigurado maghatag og daghang trabaho.
Mao kini ang pipila lamang sa positibo nga epekto sa pagbalibag sa balaod ni Cory ug sa mga alipures ug tukuron ang usa ka makiangayon ug alang sa tanan nga balaod nga mao ang pederalismo.
Ang dunot nga 1987 Philippine Constitution dili lang migun-ob sa ekonomiya apan nagpatipun-ok usab sa dagkong problema sama sa insurhensiya, kurapsyon, kapobrehon, krimen, ug daghan pang uban.
Apan ang pederalismo maoy musulbad sa mga suliran sa atong nasud karon kansang padayon gikontra sa dilawan, kumunista, simbahan’g katolotiko, ug mga kritiko, sumala ni Aparece.
RadyoMaN Joel Viray
