TACLOBAN CITY – Arestado an usa nga peke nga abugado dinhi ha syudad ha gindumara nga entrapment operation han mga tinaglawas han National Bureau of Investigation (NBI) dida han huwebes, June 20.
Ha interview han RMN kan Remy Lavilla, special investigator han NBI Regional Office 8, ginkilala an suspek nga hi Donald Gapol pero nagpapakilala ini kumo attorney Ronaldo Veloso.
Sumala kan Lavilla, may mga ginsaaran daw an suspek nga bubuligan ha ira mga kaso.
May ginpakita pa an suspek nga peke nga ID ha korte suprema gamit an ngaran nga attorney Donald Gapol.
“Papasakahan namon hiya hin kaso nga stafa, falsification of public documents ngan usurpation of authority.” – Remy Lavilla
Nahibaruan han NBI nga may ginpagawas pa nga preso an suspek pero han mahibaruan han korte in naibalik an preso ha presuhan.
Narikupo han mga otoridad tikang ha suspek an pira nga mga peke nga dokumento.
Ha pagka-yana, 5 na nga biktima an dumaop ha NBI.
