Peke nga PHP1,000 bill ginpasarang han duha nga suspek, arestado

371

TACLOBAN CITY – Naka-alerto an Basey PNP ha Samar kay mayada hira nakarawat nga report nga mayada mga nagpapasarang hin peke nga PHP1,000 bill ha Marabut ngan ha Basey.

Sanglit ha gindumara nga operasyon han mga kapulisan, naaresto an mga suspek nga ginkilala nga hira Rowell Sta Maria, 32 anyos ngan hi Roberto Sta. Maria, 60 anyos ngan pareho nga taga Brgy. Ulabtingan, Cebu City.

Basi han ginhatag nga report tikang ha Basey PNP, napasangil daw an mga suspek pagpalit ha mga Grocery Stores o mga tindahan ngan gingagamit an peke nga kwarta.

Abiso han mga kapulisan nga mayada pa daw kaurupdan ini nga mga suspek nga tikang gihap ha Cebu City nga pumakanhi ha Sinirangan Bisayas para mamiktima ngan igpasarang an peke nga salapi.

Ginpapag-ikmat yana han mga otoridad an mga tindahan nga inspeksyunon hin maupay an papel nga kwarta nga ira nakakarawat tikang ha cutomers.

Facebook Comments