TACLOBAN CITY – Arestado an usa nga nagpakilala kumo Police Official ha sakob mismo han Hinabangan Municipal Police Station.
Ginkilala an suspek nga hi Jay Bernard Salidaga, 31 anyos ngan residente han Barangay Bunacan San Isidro, Leyte.
Sumala han Hibangan Municipal Police Station nga hira in nakakarawat hin tawag tikang ha usa nga concerned citizen nga mayada usa nga lalaki nga nakasul-ot hin police uniform, may pusil, sling bag ngan hand held radio.
An suspek in kumadto mismo kan PCInsp. Edward Cugta, Chief Of Police han Hinabangan PNP ngan nagpakilala nga hi PIns. Salidaga pero napausa hi PCInsp Cugtas nga an suspek in diri nakasul-ot hin sakto nga General Office Attire Uniform ngan didto na hiya ginkwestyon ngan gindis-armahan ngan nasabtan nga toy gun la ngay-an an iya armas.
Ha facebook post ni Samar Provincial Director Nicolas Torre, an suspek in nangangampanya han iya paryente nga usa nga kandidato ha barangay election samtang nakasul-ot hin uniporme nga panpulis.
Narekober ha suspek an usa nga sling bag nga may 3 nga live ammo han Cal. 45
An suspek in in temporaryo na nga nakapaslak ngan ginpasakahan na hin kaso ha pagtalapas han Acticle 177 Usurpation Of Authority ngan 179 Illegal Use Of Uniform han Revised Penal Code ngan RA 10591 Comprehensive Firearms And Ammunition Regulations Act.
