General Santos City—Gi-angkon ni Gensan City Mayor Ronnel Rivera nga gumikan sa kadako sa dakbayan ug sa kadaghan sa papulasyon, dili gyud malikayan nga mahitabo gyud ang managlahing matang sa krimen. Subay matud pa sa inisyal nga impormasyon nga naka-abot kaniya, sagad sa mga nahimong biktima sa kaso sa pagpamusil ang nahilambigit sa investment scam, drugs ug uban pa. Apan giklaro niya nga una na niyang gihatagan ug direktiba ang kapulisan nga tutukan ang maong mga insidente aron makunhuran ang susamang krimen.
Dugang pamahayag ni Mayor Rivera nga wala siyaāy nakit-ang lapses sa kabahin sa kapulisan sa hinay-hinay nga pagbalik sa krimen sa syudad. Abtik matud pa ang kapulisan sa pangpanguna ni Police Col. Gilberto Tuzon, City Director sa Gensan City Police Office ug so far so good matud pa ang performance sa kapulisan sa pagpatuman sa peace and order. Sugyot niini sa kapulisan nga maghimo ug laing mga inobasyon aron mapugngan ang unsa mang planong krimen.
Kalabot niini, gibutyag ni Mayor Rivera nga sa ubang mga krimen sa Gensan, adunay pag-ubos apan kung basehan ang kaso sa pagpamusil, aminado kini nga nagsunod-sunod ang maong insidente kung asa sulod lang sa duha ka semana, adunay upat ang biktimang namatay samtang usa ang anaa sa balay tambalanan. Saysay pa sa Mayor sa karon, doble gyud ang trabaho sa kapulisan gumikan gawas sa pagbantay sa peace and order, labing gikinahanglan usab ang ilahang presensya aron mabatukan ang padayong pagsaka sa kaso sa covid 19.(LVR)
