Permanenteng bisa ng live birth, marriage at death certificates, lusot na sa Kamara

273

Aprubado na sa ikatlo at huling pagbasa ng Kamara ang panukala na nagbibigay ng permanenteng bisa sa live birth, marriage, at death certificates.

Sa botong 199 na sang-ayon at wala namang pagtutol ay pinagtibay ang House Bill 9175 o ang Permanent Validity of the Certificates of Live Birth, Death and Marriage Act.


Sa ilalim ng panukala ay magiging permanente na ang bisa ng Certificates of Live Birth, Death, at Marriage na inisyu, nilagdaan, sinertipikahan at pinatotohanan ng mga tanggapan ng Philippine Statistics Authority (PSA), Local Civil Registry Offices (LCRO) at ng National Statistics Office (NSO).

Hindi na kakailanganin ng isang aplikante o indibidwal na kumuha pa ng updated na certification ng live birth, death, o marriage kung mayroon namang malinaw na kopya nito.

Layon din ng panukala na mabawasan na ang gastos sa madalas na pagkuha ng mga nabanggit na certificates at para hindi na rin mahirapan sa pagkuha nito ang mga nasa malalayong lugar.

Karaniwan na ang mga ahensya ng pamahalaan at mga employers ay humihingi sa mga aplikante ng mga sertipikasyon mula sa PSA na naka-imprenta sa mga bagong security paper (SECPA) na inisyu nang hindi lalagpas sa anim na buwan.



Facebook Comments