Wala na sang kabuhi sang nasapwan sang rescuers sang Municipal Disaster Risk Reduction and Management Office sang Surallah kag Sto. Niño sa ginpatigayon nga search and retrieval operations ang biktima nga nahulog kag naanod sang nagaragasa nga tubig sang nag-agi ini sa hanging bridge sa Brgy Moloy, Surallah, South Cotabato, pasado alas 10:00 kagab-i. Ginkilala ni MDRRMO Leonardo Ballon ang biktima kay Roger H. Barneso, 44-years old, may-asawa kag residente sang Brgy Moloy, Surallah South Cotabato. Nasapwan ang biktima alas 10:00 kagaina sang aga, Mayo 19,2021 sa Sitio Pag-asa, Brgy Bai Saripinang, Bagumbayan, Sultan Kudarat. Nahibaluan nga papauli na sa ila nga balay ang biktima upod ang asawa sini kag bata sang nagluntad ang insidente. May-angot sini, ginpaidalom sa psychosocial intervention sang MSWDO Surallah ang asawa kag bata sang biktima nga upod sini sang nagluntad ang insidente. Pahanumdom naman ni Ballon sa mga residente nga nagaistar sa flashflood prone areas nga mangin alerto ilabi na sa tion nga may-yara sang pagbubo sang mabaskog nga ulan.
