Davao City – Personal nga bangi ang ginalantaw karon nga motibo sa kapulisan human gipusil-patay ang usa ka barangay kagawad sa may Prk. Tagumpay, Brgy Binuangan, Maco, Compostela kagahapong adlawa.
Kini mao ang gibutyag ni Police Regional Office 11 (PRO-XI) spokesperson P/Chief Insp. Milgrace Driz atol sa gipahigayong presser karong adlawa.
Sa record sa Maco Municipal Police Station, ang biktima giila nga si Omar Macusang, 45 anyos, kinsa midaog isip brangay kagawad sa Brgy. Pangi sa nasangpit nga lugar.
Sa imbestigasyon sa kapulisan, nasayran nga human sa oath-taking ceremony sa Maco Municipal Gym, misakay kini sa iyang pick-up ug didto gisundan dayon pusil sa makadaghang higayon sa wala mailhing duha ka mga naka motorsiklo.
Daling gisapupo sa Davao Regional Medical Center sa Tagum si Macusang apan gideklara kining patay.
Dugang ni Driz nga narespondehan gilayon ang maong insidente sa kapulisan diin naigo sa bala sa pusil ang tiil sa usa sa mga suspetsado.
Sa pagkakaron nagapadayon ang imbestigasyon sa kapulisan sa maong insidente.
RadyoMaN Jason Amisola
